Ateq Amarok pillugu

Assimi amaqqut ataatsimoortut takuneqarsinnaapput: Pingasut siulliit utoqqaapput napparsimallutilluunniit, taakku ataatsimoortunut tamanut sukkassusissamik aalajangiipput. Killormuuanik pisoqaraluarpat taakku qimataallutillu ataatsimoortut sinnerinut attaveerutissagaluarput. Tunuaniit saassussisoqassagaluarpat saassunneqassagaluarput. Taakku tulleraat nukittuut tallimat. Sinneri qeqqaniipput. Taakkulu kingornaniipput nukittut tallimat allat. Ittoqutaat kingullerpaavoq kisimiillunilu. Tunuaniit tamaasa aquppai. Tunuaniit tamaasa takusinnaavai sammivillu aalajangersinnaallugu. Ataatsimoortut tamaasa takusinnaavai. Utoqqaat sukkassusaat ilisimasaallu malillugit ataatsimoortut ingerlapput aamma nukittunerpaanit aqunneqarlutillu illersorneqarput, ikioqatigiipput imminnullu nakkutigalutik.

Inuusuttuaqqat Amarokimut inissinneqartartut ”amaqqunut ataatsimoortunut” ilannguttarput. ”Ataatsimoortut” sulisunit ilinniarluarsimasunit najugaqartunillu allanit sinnerinit illersorneqartarput. Ullut ilaanni ingerlaqqinnissami tungaanut namminneq sukkassusertik aallaavigalugu ineriartortarput, paaqqinnittarfik qimakkaluarlugu inuunerminni suli pingaarutilittut attavigisarumaarpaat.